میں ہوں فرد گامِ حیات میں ولے روزگار نیا نہیں

میں ہوں فرد گامِ حیات میں ولے روزگار نیا نہیں

یہی وہ عذابِ عظیم ہے کوئی بڑھ کے جس سے سزا نہیں

اے مذاقِ شعر برا کیا کہ لگائی کارِ عبث کی لت

کوئی اِس سے کام بنا نہیں کوئی اور کام ہوا نہیں

وہ تمام لمحے جو بے غرض طلبِ ہنر میں لگا دیے

یہ بتا رہے ہیں دمِ وداع کوئی مجھ سے ناداں بڑا نہیں

مرے حرف حرف میں رنگ تھا مرے شعر شعر میں نقش تھا

جو کمی رہی تو یہی رہی کوئی صادقین ملا نہیں

یوں چرا لیا مرے حسن کو متشاعروں نے فریب سے

مرا آئینہ بھی خفا ہوا مجھے ناز خود پہ رہا نہیں

جو سنا سنا جو کہا کہا جو ہوا ہوا جو کیا کیا

جو بنے بنے جو ملے ملے کیا بجا بجا کیا بجا نہیں

میں حیات مانگوں قضا ملے جو ممات چاہوں ملے دوام

رہا اتضاد مرے لیے میں نے ہاں کہی وہ سنا نہیں

میں چلا گیا تو بہت ہوئے مرے مدح خواں مرے قدرداں

ہے یہ قاعدہ مرے شہر کا جو مرا نہیں سو جچا نہیں

یہ حدیثِ دل یہ حدیثِ دل میں کسے کہوں میں کسے کہوں

مرے پاس رک مرے پاس رک کوئی میرے پاس رکا نہیں

کھلا اُس پہ جب مرے دل کا حال بہت دور مجھ سے چلا گیا

وہ بھی ایک قطرۂ اشک ہے جسے فکرِ چشم ذرا نہیں

اے رہینِ پیشۂ عاشقی وہ غزل سنا جسے آج تک

کسی لب کی گدی ملی نہیں کسی دل کا تخت ملا نہیں

وہ مقیمِ خانۂ دل ترا وہی فاتؔحِ عدم آشنا

ہوا عرصہ جاں سے گزر گیا تجھے آج بھی یہ پتا نہیں