منیب احمد کی شاعری

جو دل میں ہے زباں پہ نہیں لا رہے ہیں لوگ شاید یہ دھوکا جان کے ہی کھا رہے ہیں لوگ اِس گلشنِ حیات میں افسوس بن کھلے عالم میں غنچگی ہی کے مرجھا رہے ہیں لوگ اپنی شناخت کھو کے تو ہو جاؤ سب سے تم انجانے یہ سجھاؤ دیے جا رہے ہیں لوگ منزل کا نام لے تو رہے ہیں بہ صد یقیں منزل کہاں پہ ہے نہیں بتلا رہے ہیں لوگ ہر چند چاہتے ہیں نہ جائیں الی القضاء اَن چاہے پر اُسی کی طرف جا رہے ہیں لوگ سمجھے ہوئے تو خود بھی نہیں ہیں مگر سبھی اک دوسرے کو خوب سا سمجھا رہے ہیں لوگ چلتے ہیں صد ہزار پہنچتا ہے ایک آدھ اُس ایک کو بھی راہ میں بھٹکا رہے ہیں لوگ

سانس کا بندھن چھوٹ گیا تو کیا ہو گا یہ دھاگا بھی ٹوٹ گیا تو کیا ہو گا میں نے جس میں بھوک چھپا کر رکھی ہے وہ بھانڈا بھی پھوٹ گیا تو کیا ہو گا اے لڑکی یہ تیرے شوق پرانے ہیں مل یہ نیا بھی سوٹ گیا تو کیا ہو گا اپنے پاس سوائے تن من کچھ بھی نہیں وقت یہ دھن بھی لوٹ گیا تو کیا ہو گا جھوٹے شعر بنانے والی نگری میں بن میرا سچ جھوٹ گیا تو کیا ہو گا میرے فن کی نا پختہ سی گلیوں کو وقت کا پہیہ کوٹ گیا تو کیا ہو گا کاش کوئی یہ سوچتا کہ تاجر انگریز ہندستاں کو لوٹ گیا تو کیا ہو گا لوگ بہت ناراض ہیں مجھ سے ’میم الف‘ وہ پیارا بھی روٹھ گیا تو کیا ہو گا

میرؔ و اقبالؔ ہو نہ غالبؔ ہو تم الگ چیز میمؔ صاحب ہو خود کلامی ہی کرتے رہتے ہو کبھی ہم سے بھی تو مخاطب ہے سب میں رہتے ہو سب سے بیگانے کچھ بتاؤ تو کس کی جانب ہو؟ غمِ دنیا نہ فکر عقبیٰ کی تم مسلمان ہو کہ راہب ہو؟ ساتھی تیرے ساتھ سے ہم پہ ظاہر ہے ساتھ نبھانا اپنے بس کی بات نہیں ہے سادہ سی اِک زندگی کو اُلجھا لیا ہے سہج بنانا اپنے بس کی بات نہیں ہے دوسروں کے میں کام تو کرتا ہوں لیکن کام کرانا اپنے بس کی بات نہیں ہے پیڑوں کے پھل کھانے کی حسرت تو ہے پیڑ ہلانا اپنے بس کی بات نہیں ہے آج سے میں بس شعر لکھوں گا کاغذ پر ویڈیو بنانا اپنے بس کی بات نہیں ہے شاعری کر کے ذہن بہت تھک جاتا ہے ہل یہ چلانا اپنے بس کی بات نہیں ہے

میں تو شاعر ہوں اِس لیے اکثر میرا سیدھا دماغ چلتا ہے تو بہت منطقی ہے سو ہر وقت تیرا اُلٹا دماغ چلتا ہے

ظرف میں تم کو دے جاتا ہوں تم اُن میں پانی بھر لینا یعنی حرف میں دے جاتا ہوں تم اُن میں معنی بھر لینا

نہ کر غم کہ کتنی گئی زندگی ہر اِک گام پر ہے نئی زندگی چپکتے ہیں اِس سے تو چھٹتے نہیں بڑی چپچپی ہے لئی زندگی کوئی اِس کو سمجھا نہیں آج تک خدا جانے کیا ہے بھئی زندگی نہ کچھ مرنے والوں کا غم کیجیے ہے اپریل موت اور مئی زندگی زمینِ غزل پر مکانات میؔم بناتے بناتے ڈھئی زندگی

تو سمجھتا ہے بہت تو اہم ہے بھول ہے تیری‘ یہ تیرا وہم ہے موت کا کیا سامنا کر پائے گا؟ جب گیا تو زندگی سے سہم ہے! ہڈّیوں کا ڈھیر ہی رہ جائے گا پہلواں! مانا تو کوہِ لحم ہے میری باتوں کو سمجھتے ہیں فہیم اُس قدر ہی جتنا اُن کا فہم ہے رونقِ بازارِ دنیا‘ سچ بتا! کیا ترے دل میں بھی گہما گہم ہے؟ عدل کا خواہاں نہیں ہوں ’میم الف‘ جس کا میں طالب ہوں‘ اُس کا رحم ہے