رخسار ترا مشعلِ سوزاں نظر آئے

رخسار ترا مشعلِ سوزاں نظر آئے
چہرہ ترا مہتابِ درخشاں نظر آئے
مکھڑا ترا روشن سا جواہر کی جھلک دے
دندان ترا گوہرِ تاباں نظر آئے
شارع جو بنائے تو کوئی دل تلک اپنے
اُس راہ پہ ہر شخص خراماں نظر آئے
دولت جو لگے بانٹنے تو حسن کی اپنے
یہ درہم و دینار فراواں نظر آئے
تصویر اُتارے جو تری زلفِ سیہ کی
نقاش وہ کم بخت پریشاں نظر آئے
شوخی سے اذاں تو کبھی دے جائے تو ہر ایک
واللہ مساجد میں مسلماں نظر آئے
اَسرار اگر تیرے تبسم کے بیاں ہوں
تحقیق کہ یاں ہر کوئی حیراں نظر آئے
تو دشت میں گر جا بسے، اے رونقِ عالم!
دو روز میں ہر شہر بیاباں نظر آئے
پڑ جائے کسی پر جو تری گردِ کفِ پا
دنیا کو گداگر بھی وہ سلطاں نظر آئے
جو دن کو نظارہ کرے تیرا قدوقامت
اُس آنکھ کو خوابوں میں گلستاں نظر آئے
اے مایۂ گم گشتہ و ناپید میں تجھ پر
واروں دل و دیں گر تو مری جاں نظر آئے
تھے وصل میں بکھرے ہوئے کچھ ٹوٹے ہوئے تھے
جو خواب ہمیں ہجر کے دوراں نظر آئے
ہم قیدِ قفس کے متمنی تو نہیں تھے
کیا کیجے جو گل زار بھی زنداں نظر آئے
در پردہ ہے گر حسن تو اعجاز ہی کیا ہے
مشتاقِ تعشق ہے تو عریاں نظر آئے
یہ رسمِ غزل خونِ غزل کے ہے مرادف
ہر شعر میں رازِ جہاں پنہاں نظر آئے
چھاتی اب اِن آفاق کی چیرو مری آنکھو
شاید کہ وہیں شہرِ نگاراں نظر آئے
محمل میں نہ لیلیٰ ہے، نہ ہے دشت میں مجنوں
دیوانگی اب سر بہ گریباں نظر آئے
فاتؔح یوں ہی اشعار کہے بہرِ تفنن
پھر دیکھیے اِس شغل میں دیواں نظر آئے

اس بلاگ سے مقبول پوسٹس

مست چاند

انجم بہ کف ہے رات صراحی بہ دست چاند پی پی کے نور مہر کا نکلا ہے مست چاند ہرچند گل کیے سبھی اسبابِ روشنی لیکن بجھا نہ پائے کبھی شب پرست چاند دشتِ فلک میں فکرِ دگرگوں کے واسطے کرتا ہے روشنی کا سدا بندوبست چاند آدم کی دست رس سے ہیں افلاک دم بہ خود زہرہ ہے اِک زقند تو ہے ایک جست چاند شب رو کو حق طلب یہ دکھاتا ہے راہِ حق شاید کہ ہو گا شاہدِ روزِ الست چاند کیوں کر کہوں کہ لگتا ہے وہ مجھ کو ماہ وش ذوقِ رفیع اپنے کے آگے ہے پست چاند دیپک، کنول، چراغ، دیے، موم بتیاں ہیں دل شکستہ پر نہیں مانا شکست چاند کہنا اُسے کہ بیت گیا ایک اور سال نکلے جو اب کے پہلی کا ماہِ اگست چاند کیا ہے منیبؔ اپنے تخیل سے ماورا تاروں میں بود و باش کبھی بود و ہست چاند
مزید پڑھیں

اِک بار ترے دیکھنے کی چاہ تھی ہم کو

اِک بار ترے دیکھنے کی چاہ تھی ہم کو سو پوری ہوئی پوری ہوئی پوری ہوئی ہے کچھ پاس ہوئے پاس ہوئے پاس ہوئے تھے پھر دوری ہوئی دوری ہوئی دوری ہوئی ہے مختاری ہی مختاری ہی مختاری تھی خواہش مجبوری ہی مجبوری ہی مجبوری ہوئی ہے خباز نے پیڑے کو تپایا ہے بہت سا تب جا کے کہیں روٹی یہ تندوری ہوئی ہے اِس عاشقی کے نام پہ ہم خستہ تنوں سے مزدوری ہی مزدوری ہی مزدوری ہوئی ہے اے روشنیِ ماہ تری جلوہ گری سے مہ نوری ہی مہ نوری ہی مہ نوری ہوئی ہے منیب احمد 2 ستمبر 2024 لاہور
مزید پڑھیں

ایک صبح دس بجے

صبح کے دس بج رہے ہیں۔ آج مجھے یونیورسٹی نہیں جانا اور میرا بڑا دل کر رہا ہے کہ کچھ لکھوں۔ ویسے تو میں نے آج تک کچھ کم نہیں لکھا۔ کئی دفتر سیاہ کیے ہیں شاعری اور زبان دانی کے شوق میں۔ لیکن پھر بھی دل نہیں بھرا۔ جی چاہتا ہے مزید کھل کر لکھوں۔ بغیر ردیف اور قافیے کی پابندی کے۔ بغیر بحروں کی قید کے۔ آزادانہ! بےباکانہ! لیکن لکھوں کس بارے؟ میں کس بارے میں جانتا ہوں؟ شاعری؟ زبان و ادب؟ فلسفہ؟ زندگی؟ موت؟ نہیں! ضروری تو نہیں اُسی بارے میں لکھوں جسے میں جانتا ہوں۔ کیوں نہ اُس بارے میں لکھوں جسے میں نہیں جانتا۔ ایسا کیا ہے جسے میں نہیں جانتا؟ میں اپنے آپ کو نہیں جانتا! چلو، پھر اپنے بارے میں ہی لکھتا ہوں۔ لیکن اپنے بارے میں کس بارے لکھوں؟ میری سوچ، میری عادتیں، میرے خیالات، میرا گھربار۔۔۔ نہیں! اِتنا میرا میرا میں نہیں کرنا چاہتا۔ مجھے میرے میں دل چسپی نہیں، نہ تیرے میں ہے۔ میرے تیرے کے پار کہیں جانے کا دل کرتا ہے۔ جہاں نہ میں، نہ تو! نہ آج، نہ کل! نہ رات، نہ دن! نہ دھوپ، نہ چھاؤں! ایسی جگہ کون سی ہے؟ کون جا...
مزید پڑھیں