کرنی ہے تو کر لو ورنہ معاف کرو

کرنی ہے تو کر لو ورنہ معاف کرو

میں تو نہیں کہتا کہ مجھ سے بات کرو

اُس سے ہفتے دو ہفتے میں مل آؤ

کس نے کہا ہے پابوسی دن رات کرو

عامل بابا پہلے اپنا جن پکڑو

بعد میں قابو اوروں کے جنات کرو

ہمت ہے تو ہم سخنِ منصور بنو

حوصلہ ہے تو پیرویِ سقراط کرو

کس نے کیا ہے؟ کس پہ کیا ہے؟ ہوش نہ ہو

کرنے ہوں تو ایسے احسانات کرو

بات وہ کیا ہے جس میں ہو اندازِ غیر

کرنی ہو تو اپنے ڈھب کی بات کرو

آنسو دیکھ کے بھی تم ہنستے رہتے ہو

کچھ تو ہماری توقیرِ جذبات کرو