احسان مانتے ہیں نہ آداب جانتے ہیں

احسان مانتے ہیں نہ آداب جانتے ہیں
اب بندے اپنے آپ کو ہی صاب جانتے ہیں
تم بادشہ ہو حسن کے‘ ہم عشق کے شہنشہ
دونوں ہی اپنے آپ کو نواب جانتے ہیں
تم زندگی میں دیکھتے ہو خواب سو طرح کے
پر ہم تو زندگی کو ہی اِک خواب جانتے ہیں
پانچوں حواس کھوئے گئے جیسے پانچ دریا
سو اپنے تن کو صوبۂ پنجاب جانتے ہیں
ہم نیلے آسمان کے پنجرے میں قید پنچھی
اپنے پروں میں سب پرِ سرخاب جانتے ہیں
کم فائدے کو جانتے نقصان تم ہو لیکن
نقصان کم ہو‘ اِس کو بھی ہم لابھ جانتے ہیں
یوں تو وسیع حلقہ ہمیں جانتا ہے لیکن
گہرائی میں منیبؔ کچھ احباب جانتے ہیں

اس بلاگ سے مقبول پوسٹس

آشناے غم پایا رازدانِ دل پایا

آشناے غم پایا رازدانِ دل پایا آج پھر محبت کو پاسبانِ دل پایا شوخ رنگ چہروں کو ساکنانِ دل پایا چشم ہاے روشن کو قاتلانِ دل پایا اہتمامِ ہستی کو امتحانِ دل پایا اور سخت مشکل میں کاروانِ دل پایا تیری انجمن کے بعد اپنی خلوتیں دیکھیں اور پھر خموشی کو قدردانِ دل پایا مل گیا جوابِ خط غم سے دوستی پائی تیری سرد مہری کو میہمانِ دل پایا بس کہ برملا کہیے اہلِ حسنِ ظاہر کو آج تک اگر فاتحؔ صاحبانِ دل پایا
مزید پڑھیں

اپنے بس کی بات نہیں ہے

پڑھنا پڑھانا اپنے بس کی بات نہیں ہے لکھنا لکھانا اپنے بس کی بات نہیں ہے چپ رہ جانا کچھ نہیں کہنا بس میں ہے شور مچانا اپنے بس کی بات نہیں ہے تک بندی ہم کر لیتے ہیں تھوڑی سی شعر بنانا اپنے بس کی بات نہیں ہے سادہ سے اِک آدمی ہیں ہم ایم اے پاس زیادہ کمانا اپنے بس کی بات نہیں ہے ساتھی تیرے ساتھ سے ہم پہ ظاہر ہے ساتھ نبھانا اپنے بس کی بات نہیں ہے سادہ سی اِک زندگی کو اُلجھا لیا ہے سہج بنانا اپنے بس کی بات نہیں ہے دوسروں کے میں کام تو کرتا ہوں لیکن کام کرانا اپنے بس کی بات نہیں ہے پیڑوں کے پھل کھانے کی حسرت تو ہے پیڑ ہلانا اپنے بس کی بات نہیں ہے آج سے میں بس شعر لکھوں گا کاغذ پر ویڈیو بنانا اپنے بس کی بات نہیں ہے شاعری کر کے ذہن بہت تھک جاتا ہے ہل یہ چلانا اپنے بس کی بات نہیں ہے
مزید پڑھیں

ہوں میں کل سنسار سے اوبا ہوا

ہوں میں کل سنسار سے اوبا ہوا اور اپنے آپ میں ڈوبا ہوا ہو گئی تقدیر آخر کامیاب اپنا ہر ناکام منصوبا ہوا تو محب اپنا ہوا نہ ایک دل میں ترا سارا ہی محبوبا ہوا جب ہوئی ہم کو طلب تیری ہوئی جب ہوا تب تو ہی مطلوبا ہوا اِس طرح سے ہو گیا تن خشک تر جس طرح پنجاب کا صوبا ہوا میں ہوا یعنی کہ ناممکن ہوا میں مٹا یعنی کہ اعجوبا ہوا ہر نگر اپنے لیے جنت ہوا ہر شجر اپنے لیے طوبا ہوا جس پہ غالب ہو گئی دنیا کی فکر آخرش فکروں کا ملغوبا ہوا میم ہے کوئی نہ کوئی ہے الف اِس تخلص سے بھی ہوں اوبا ہوا
مزید پڑھیں